الحمدالله على نعمه الأمان

بسم الله الرحمن الرحيم

من اول ما بدا رمضان ماطلعت من البيت

او بالاحرى صارلي بالضبط اسبوع مو طالعه، من الخميس الي طاف تحديدا

واول مره تمر علي فتره طويله جيذي من غير لا اطلع

فاليوم حسيت انه اذا ماطلعت راح اختنق

نطرت امي وابوي يرجعون لانهم كانو وطالعين وقلت حق امي لازم تطلعيني الحين وتوديني اي مكان اغير جو

كانت تقريبا الساعه 12 باليل

فالي الي صار انه حنيت عليها شوي ليما رضت وطلعنا

انا واختي الكبيره وامي

مادام كل المحلات مسكرين وكنا متعشين ماكلين

ماكان عندنا الا مكان واحد نروحله

ماك البحر ناخذ ايسكريم ونرجع

وهذا الي سويناه

مشينا على البحر ليما وصلنا المكان، طلبنا ايسكريم، كليناه بالسياره على ما رجعنا

بس واحنا بالطريج، شي لفت انتباهي وخلاني افكر واحمد ربي على النعمه الي احنا فيها

صج انه كانت الساعه 12 باليل، بس ماشاء الله كان في وايد ناس طالعين

والشوارع مو فاضيه

والاوادم بالمطاعم والكوفيشوبز جنه الساعه 8

بتقولونلي لان رمضان فهالشي طبيعي

على ما خلصو صلاة التراويح وريحو شوي عادي تصير الساعه 12 والناس للحين بره

بس مو هني النقطه

انه مو بس شباب وريايل الي بالشوارع

لأ، نسوان وبنات وعايلات ويهال بعد

الساعه 12 باليل او 1 الصبح نسوان وبنات بره

هذا الشي مايصير بكل مكان

ومادام قاعد يصير هني

والاوادم قاعدين يأمنون يطلعون عيالهم بنص الليل

يدل على شي واحد

على الأمان

يعني سبحان الله هاذي نعمه انا شخصيا ولا مره قعدت وفكرت وحمدت ربي عليها

انا متأكده انه ماكو بلد ثاني بالدنيا الحريم يقدرون يطلعون بنص الليل يروحون مطاعم ويروحون اي مكان وجيذي يكون أمان

حتى بأمريكا واوروبا

احس انه مستحيل بنات بروحهم يطلعون بنص الليل بشكل طبيعي

فالحمدالله والف الحمدالله على الامان الي احنا فيه

هاذي نعمه وايد كبيره المفروض مانستهين فيها ولا نستهزأ فيها

وايد بلدان تخلص الحياة عندهم عند اذان المغرب

عقب اذان المغرب مافي حريم يطلعون بروحهم

ليش؟ لان المكان كله سكارى وميانين وحيوانات

فألف الحمدالله انه احنا ماعندنا جيذي

الله عطانا نعمه وايد كبيره، وايد ناس محرومين منها

الحمدالله

اصلا بعدين لما قعدت افكر بالموضوع

انتبهت انه اصلا ابوي مستحيل راح يخلينا نطلع بهال الوقت

الا اذا كان يدري انه صج ماكو خوف وفي امان وماكو شي ممكن يصيرلنا

وبس

هذا الي صار معاي اليوم

وهذه اول محاولاتي بالكتابه

وكل عام وانتو بخير